सुषमा अंधारे यांची राणे पिता-पुत्रांवर टीका

१६ नोव्हेंबर २०२२

केंद्रीय मंत्री नारायण राणे यांच्यासह त्यांची दोन मुलं निलेश राणे आणि नितेश राणे हे अनेकदा शिवसेना पक्षप्रमुख उद्धव ठाकरे यांच्यावर टीका करत असतात. राज्यात शिंदे-फडणवीस सरकार स्थापन झाल्यानंतर राणे पिता-पुत्रांनी अनेकदा उद्धव ठाकरेंविरोधात आक्रमक भूमिका घेतली आहे. या घडामोडींनंतर आता शिवसेनेच्या उपनेत्या सुषमा अंधारे यांनी नारायण राणे यांच्यासह त्यांच्या दोन्ही मुलांवर टीका केली आहे.

राणे पिता-पुत्रांवर टीकास्र सोडताना सुषमा अंधारे म्हणाल्या, नारायण राणेंची जी दोन बारकी-बारकी पोरं आहेत, त्यांनी अनेकदा मातोश्रीवर टीका केली. मी बारक्या लेकरांबद्दल फार काही बोलत नसते. अजिबात बोलत नसते. पण ती जी दोन बारकी-बारकी लेकरं आहेत ना… त्यांनी उंची नसताना मातोश्रीवर गरळ ओकली आहे. मी त्यांच्या बौद्धिक उंचीबद्दल बोलतेय. पण देवेंद्र फडणवीसांची त्यांच्यावर कारवाई करण्याची हिंमत झाली नाही” अशी टीका अंधारे यांनी केली.