मराठमोळी गिरीजा ‘माउंट एल्ब्रुस’वर फडकविणार महाराष्ट्राचा झेंडा…युरोपातील मोहिमेसाठी मंगळवारी होणार रवाना… आमदार महेश लांडगे यांच्याकडून कौतुकाची थाप

रोहित खर्गे
विभागीय संपादक

भोसरी- दि २० जुलै २०२१
युरोप खंडातील सर्वांत उंच मानल्या जाणारे माउंट एल्ब्रुस ज्याची उंची तब्बल ५ हजार ६४२ मीटर आहे. हे शिखर सर करण्यासाठी भोसरीतील १२ वर्षीय गिरीजा लांडगे आज मंगळवारी (दि.२०) रवाना होणार आहे. या मोहिमेसाठी गिरीजाने कठोर परिश्रम घेतले असून, तिच्या या मेहनतीला भोसरी विधानसभा मतदारसंघाचे आमदार महेश लांडगे यांनी कौतुकाची थाप दिली. या मोहिमेद्वारे ‘लेक वाचवा, लेक जगवा’ हा संदेश देण्यात येणार आहे.
गिरीजाच्या ‘माउंट एल्ब्रुस ‘ या मोहीमेचा फ्लॅग ऑफ भोसरी पीएमटी चौक येथे श्री. छत्रपती शिवाजी महाराज मूर्तीसमोर करण्यात आला. यावेळी भाजपा शहराध्यक्ष तथा आमदार महेश लांडगे व ग्रामस्थ उपस्थित होते.
माउंट एल्ब्रुस हे युरोप खंडातील सर्वोच्च शिखर मानले जाते. निद्रिस्त ज्वालामुखी म्हणूनही या पर्वताला ओळखले जाते. तेथील तापमान उणे २५ ते ४० डिग्रीपर्यंत असते. ‘माउंट एल्ब्रुस ‘ सर करण्यासाठी योग्य प्रशिक्षण, मेहनत आवश्यक असते. गिर्यारोहकांच्या मनाचा अंत पाहणारा पर्वत ओळखला जातो. प्रचंड थंडी आणि वार्याचे घोंगावणारे झोत अशा वातावरणाचा प्रसंगी सामना करावा लागतो. येथील वातावरण सतत बदलते असते. त्यामुळे शारीरिक आणि मानसिक तयारी करूनच या मोहिमेची निवड करावी लागते, असा अनेक गिर्यारोहकांचा आजपर्यंतचा अनुभव असल्याचे गिरीजा हिचे वडील धनंजय लांडगे यांनी सांगितले.
धनंजय लांडगे म्हणाले की, या शिखरावर चढाई करण्यासाठी गिरीजाची तयारी पूर्ण आहे. भोसरीतून आज (२० जुलै) ती निघणार आहे. सलग १० दिवसांची ही मोहीम असून, या शिखरावर चढाई करणारी ती महाराष्ट्रातील व भारतातली पहिलीच मुलगी आहे . गिरीजाने आत्तापर्यंत सह्याद्रीतील लिंगाणा, वजीर, तैलबैल, नागफणी, कळकराय, संडे-१, संडे-२, वानरलिंगी असे अवघड सुळके सर केले आहेत. त्याबरोबर नाशिक जिल्ह्यासह महाराष्ट्रातील ६५ किल्ल्यांवर भटकंती केली आहे.तिच्या लिंगाणा, वजीर या सुळक्यांवर केलेल्या चढाईची युनिक बुक ऑफ वर्ल्ड रेकॉर्ड्स व इंडिया बुक ऑफ रेकॉर्ड्स मध्ये यंगेस्ट माउंटेनिअर म्हणून नोंद झालेली आहे.
*
गिरीजा पिंपरी-चिंचवडकरांचे नाव उंचावतेय…
पिंपरी-चिंचवड शहरातील भोसरी गावात राहणारी गिरीजा बाल गिर्यारोहक म्हणून प्रसिद्ध आहे. या आधी तिने अशाच पद्धतीने अनेक अवघड मोहिमा सर केल्या आहेत. तिच्या या अनेक मोहिमा सामाजिक संदेश देणाऱ्या असतात. गिरीजा बाल गिर्यारोहक म्हणुन नक्कीच आमचे नाव उंचावत आहे, अशा भावना भाजपा शहराध्यक्ष तथा आमदार महेश लांडगे यांनी व्यक्ती केली.