प्रजासत्ताक दिनी आंबेगाव तालुक्यातील ब्लू मॉरमॉन फुलपाखरू व शेकरूची प्रतिमा दिल्लीतील चित्ररथाच्या अग्रभागी दिसणार

मोसीन काठेवाडी
आंबेगाव ब्युरोचिफ
२५ जानेवारी २०२२

आंबेगाव

दिल्लीत प्रजासत्ताक दिनी सहभागी होणाऱ्या महाराष्ट्राच्या चित्ररथात गौरवशाली आंबेगाव तालुक्यातील ब्लू मॉरमॉन फुलपाखरू व शेकरू ” ही दोन मानके अग्रभागी मिरवणार दिसणार आहेत. यावर्षीच्या प्रजासत्ताक दिनी दिल्लीला होणाऱ्या संचलनात ‘महाराष्ट्रातील जैवविविधता मानके’ या विषयावर आधारित चित्ररथ सहभागी होणार आहे. यात गौरवशाली आंबेगाव तालुक्यातील “भीमाशंकर” च्या संरक्षित अभयारण्यामध्ये आढळणाऱ्या राज्य फुलपाखरू “ब्लु मॉरमॉन” या प्रजातीच्या फुलपाखराची आठ फुटांची हलती प्रतिकृती अग्रभागी असणार आहे. तसेच आपल्याच भीमाशंकर अभयारण्यात आढळणाऱ्या “शेकरू” या राज्य प्राण्याची देखील प्रतिकृती मध्यभागी ठेवण्यात आलेली आहे.राज्यातील असणारी जैवविविधता जगासमोर यावी ही संकल्पना या चित्ररथातून साकारण्यात आलेली आहे आणि या संकल्पनेत आंबेगाव तालुक्यातील भीमाशंकर चा संरक्षित अभयारण्यातील “ब्ल्यू मॉरमॉन” फुलपाखरू व “शेकरू” या दोन महत्त्वाच्या मानकांचा समावेश केला गेलेला आहे ही आपल्या तालुक्याच्या दृष्टीने अतिशय अभिमानास्पद बाब आहे. यातून आपल्या गौरवशाली आंबेगाव तालुक्याचे देशाच्या जैवविविधतेच्या संदर्भातील असणारे महत्त्व अधोरेखित होते.

महाराष्ट्र हे जैवविविधतेने संपन्न असे राज्य असून पर्यावरणाच्या संरक्षणासाठी देखील महाराष्ट्र आघाडीवर आहे. युनेस्कोने मान्यता दिलेल्या सूचीमध्ये महाराष्ट्रातील ‘कास पठार’चा समावेश आहे. तसेच राज्य शासनाने राज्यातील प्राणी, पक्षी तसेच अन्य जीवांसाठी राष्ट्रीय स्तरावर अभयारण्य राखीव ठेवले आहे. अनेक दुर्मिळ वनस्पती तसेच प्राण्यांच्या प्रजाती या महाराष्ट्रात आढळतात. ‘शेकरू’ हा महाराष्ट्राचा राज्यप्राणी आहे. ‘हरियाल’ हे विशेष असलेले कबुतर राज्यपक्षी म्हणून घोषित करण्यात आले आहे. ‘ब्ल्यू मॉरमॉन’ या विशेष प्रजातीची राज्य फुलपाखरू म्हणून घोषणा करणारे महाराष्ट्र हे प्रथम राज्य आहे. महाराष्ट्रातील हीच जैवविविधता चित्ररथाच्या माध्यमातून मांडण्यात येणार आहे. यंदाच्या चित्ररथावर दर्शनी बाजूस भव्य ‘ब्ल्यू मॉरमॉन’ फुलपाखराची ८ फूट उंचीची देखणी प्रतिकृती आहे. तसेच दीड फूट दर्शविणारे राज्यफुल ‘ताम्हण’ याचे अनेक गुच्छ दर्शविले आहेत त्यावर इतर छोटी फुलपाखरे यांच्या प्रतिमा आहेत. चित्ररथावर १५ फूट भव्य असा ‘शेकरू’ राज्यप्राणी तसेच युनेस्कोच्या सूचीमध्ये समावेश असलेल्या कास पठाराची प्रतिमा दर्शविण्यात आलेली आहे. चित्ररथाच्या दर्शनी भागात कास पठारावर आढळणारा सरडा ‘सुपारबा’ ३ फूट उंच दर्शविला आहे, त्यामागे राज्यपक्षी “हरियाल”ची प्रतिमा दर्शविण्यात आली आहे.

चित्ररथाच्या अंतिम भागात वृक्षाच्या फांदीवर बसलेल्या राज्यप्राणी शेकरूची प्रतिमा व त्यामागे राज्यवृक्ष आंबा वृक्षाची प्रतिमा सुमारे १४ ते १५ फूट उंचीपर्यंत आहे. तसेच दुर्मिळ “माळढोक” पक्षी, महाराष्ट्रात नव्याने सापडलेली “खेकड्याची प्रजाती”, नव्याने सापडलेला “मासा, वाघ, आंबोली झरा, तसेच फ्लेमिंगो, मासा, गिधाड, घुबड” या पक्ष्यांच्या ४ ते ५ फूट उंचीच्या प्रतिकृती आहेत. तसेच रचनात्मक व सुंदर कलात्मक दृष्टिकोन ग्राह्य धरून अनेक जैवविविधता दिसतील, असे देखावे तयार केले आहेत.
या चित्ररथाची संकल्पना, सांस्कृतिक कार्य संचालनालयाची असून त्यावर अनेक कलाकार काम करीत आहेत. महाराष्ट्रातील वैविध्यपूर्ण जैव वारसा कवितेच्या व मधुर संगीताच्या रूपात मांडण्यात आलेला आहे.