पिंपरी : २७ वर्षांपूर्वी पत्नीचा खून करून फ़रार झालेल्या पतीला अटक करण्यात पिंपरी चिंचवड गुन्हे शाखा युनीट १ च्या पथकाला यश मिळाले आहे. त्याने १९९५ साली भोसरी पोलीस ठाणे हद्दीत आपल्या पत्नीच्या डोक्यात दगडी उखळ घालून तिचा खून केला होता.
रामा पारप्पा कांबळे असे आरोपीचे नाव असून त्याने आपली पत्नी सुशिलाबाई रामा कांबळे उर्फ लोखंडे हिचा डोक्यात दगडी उखळ घालून खून केला होता. आरोपी बद्दल नातेवाईक व शेजाऱ्यांकडून काहीही माहिती मिळत नव्हती. पोलिसांनी या प्रकरणाचा तपास चिकाटीने सुरू ठेवला होता.आरोपी हा त्याच्या मुळगावी कोळनुर, लोहारा येथे येऊन जाऊन असतो अशी माहिती पोलिसांना मिळाली. नंतर पोलिसांचे पथक त्याच्या गावी गेले. तेथे त्यांना आरोपीने अक्कलकोटजवळ एका महिलेशी लग्न केले असून तो तिथे त्याचे नाव बदलून राहतो असे समजले. पोलीस अक्कलकोट येथील पालापूर येथे गेले असता आरोपी हा तेथे रामा कोंडिबा बनसोडे (वय 66) या नावाने रहात असून तो मिळेल ते मजुरीचे काम करतो असे समजले. त्याची पत्नी मुकी असल्याने पोलिसांना फ़ारशी माहिती मिळाली नाही. चिकाटीने तपास करून आरोपी सध्या उर्से गाव येथे विटभट्टीवर काम करत असल्याचे शोधून काढले. त्यानंतर त्याला विटभट्टीवर जाऊन ताब्यात घेतले असता त्याने चारित्र्याच्या संशयावरून पत्नीचा खून केल्याचे कबूल केले. तो त्याचे राहण्याचे ठिकाण सतत बदलत असल्याने त्याला पकडणे कठीण जात होते.
आणखी एक आरोपी पोलिसांच्या हाती
वरील तपास मोहिमे दरम्यान भोसरी पोलीस ठाण्यातच दाखल असलेल्या आणखी विनयभंगाच्या गुन्ह्यातील आरोपी हा फरार होता. त्या आरोपीचे मूळगाव देखील कोळनूर, लोहारा येथील रहिवासी असल्याने समांतर तपास करत पोलीस पथकाने महेश भिमराव कांबळे याला देखील पोलिसांनी अटक केले.
ही कारवाई पिंपरी-चिंचवड आयुक्तालयाच्या गुन्हे शाखा एकेचे वरिष्ठ पोलीस निरीक्षक ज्ञानेश्वर काटकर, सहायक पोलीस निरीक्षक शिवाजी कानडे व पोलीस हवालदार फारुक मुल्ला,पोलीस नाईक प्रमोद हिरळकर, पोलीस शिपाई मारुती जायभाये, पोलीस नाईक मोरे, पोलीस शिपाई रुपनवर यांनी केली. तसेच तांत्रिक तपास हा पोलीस हवालदार नागेश माळी यांनी केला.
Related