दोन दिवसांत दोन आत्महत्यांनी मावळ हादरला

किर्तनकार मोरेनंतर पीएसआय गुंजाळांनी जीव दिला

उत्तम कुटे,संपादक
पिंपरीःदोन दिवसांपूर्वीच (ता.५) संत तुकाराम महाराज यांचे वंशज, प्रसिद्ध किर्तनकार आणि व्याख्याते शिरीष महाराज मोरे (वय ३२)यांनी राहत्या घरी देहू येथे गळफास घेऊन आत्महत्या केली.त्यामुळे मावळात मोठी खळबळ उडाली होती. कर्जबाजारी झाल्याने या महिन्यात २० तारखेला लग्न असलेल्या शिरीष महाराजांनी आपली इहलोकीची यात्रा संपवली होती. त्यानंतर पुण्यात खळबळ उडविणारी दुसरी आत्महत्या आज मावळात झाली.खडकी पोलिस ठाण्यातील उपनिरीक्षक तथा फौजदार (पीएसआय) अण्णा गुंजाळ यांनी लोणावळ्यातील टागगर पॉंईटजवळ झाडाला गळफास घेऊन जीव दिला.

गुंजाळ यांच्या आत्महत्येचे कारण लगेच समजू शकले नाही.मात्र,घटनास्थळी त्यांच्या मोटारीत डायरी मिळून आली.त्यातून त्यांच्या आत्महत्येमागील कारणाचा सुगावा लागू शकतो.लोणावळा ग्रामीण पोलिस ठाण्यात याबाबत आकस्मिक मृत्यू म्हणून नोंद करण्यात आली आहे. गुंजाळांच्या आत्महत्येचे निश्चीत कारण लगेच समजू शकलेले नसून सध्या प्राथमिक तपास सुरु आहे,असे लोणावळा ग्रामीण पोलिस ठाण्याचे वरिष्ठ पोलिस निरीक्षक किशोर धुमाळ यांनी आपला आवाजला सांगितले. गुंजाळ हे खडकी पोलिस ठाण्याच्या गुन्हे प्रकटीकरण शाखेत (डीबी) काम करीत होते. गेल्या तीन दिवसांपासून कामावर गैरहजर होते.त्यांचा फोन बंद होता. ते मिसिंग झाल्याची नोंद पोलिस आज घेणारच होते. पण,त्यापूर्वीच लोणावळ्यात त्यांनी आत्महत्या केल्याचे समजले.झाडाला एक बॉडी लटकत असल्याचा फोन ११२ या नंबरवर पोलिसांना गेला अन हा प्रकार उघडकीस आला. शिरीष महाराजांसारखे कारण गुंजाळ यांच्याही आत्महत्येमागे आहे का,अशी चर्चा ऐकायला मिळाली.ते मूळचे अहिल्यानगर जिल्ह्यातील रहिवाशी होते.